30 августта Казанда «Ачык йөрәкләр шәһәре» инклюзив бәйрәме узачак

(Казан шәһәре KZN.RU, 26-нчы август). Татарстан Республикасы һәм Казан шәһәре көнендә Иске Татар бистәсендә «Ачык йөрәкләр шәһәре» инклюзив бәйрәме узачак. Бәйрәмнең үзенчәлеге - инвалидлыгы булган һәм булмаган артистларның уртак чыгышлары.

Бәйрәмдә бөтен республикадан иҗат коллективлары чыгыш ясаячак, алар арасында хореография һәм иҗат студияләре, шулай ук «Жемчужина Татарстана» инвалидлыгы булган хатын – кызлар арасында Матурлык конкурсында җиңүче Вероника Лазарева һәм башкалар бар. «Э-моция» иҗади инклюзив студиясе Кырымда РФ Президенты грантын кулланып оештырылган «Инклюзив иҗади каникуллар» проекты кысаларында әзерләнгән программа тәкъдим итәчәк.

Иске Татар бистәсендә, Каюм Насыйри урамында 30-нчы август 14.30 сәгатьтә бәйрәм кунакларын көтәләр, дип хәбәр иттеләр «Э-моция» иҗади инклюзив студиясендә.

Шунысын да билгеләп үтәргә кирәк, мондый инклюзив мәйданчык Татарстан Республикасы көнендә һәм Казан көнендә инде өченче тапкыр оештырыла.