Һөнәри конкурслар һәм хезмәт ярминкәләре Казанда эшче һөнәрләрнең абруен күтәрә

Казанда эшче һөнәрләрнең абруен күтәрү һәм һөнәри осталыкны үстерү өстендә актив эшлиләр. Бөтенроссия эшкә урнаштыру ярминкәсе, һөнәри конкурслар һәм фестивальләр әлеге эштә нәтиҗәле кораллар булып тора.

2025 елда «Россия эше. Мөмкинлекләр вакыты» ике этапта узды. Төбәк этабы апрельдә «УНИКС» мәдәни-спорт комплексы базасында үтте. Анда 80 нән артык предприятие, шул исәптән оборона-сәнәгать комплексының 17 оешмасы, шулай ук 10 мәгариф учреждениесе катнашты. Чарага 5754 кеше килде, ярминкә йомгаклары буенча 617 дәгъвачы эшкә урнаштырылды.

Федераль этап 28 июньдә, Яшьләр көнендә, «Урам» экстрим-паркында узды. Анда 40 оешма катнашты, алар 3 меңнән артык вакансия тәкъдим итте. Ярминкәдә 27 меңгә якын кеше катнашты.

Һөнәри конкурсларга аерым игътибар бирелә. Ярминкәнең федераль этабы кысаларында 27 июньдә Казанда «Икенче старт» махсус номинациясендә «Һөнәре буенча иң яхшысы» конкурсы узды. Төбәк этабында «Метроэлектротранс» МУП электропоезды машинисты Станислав Нижегородцев җиңде, ул, федераль дәрәҗәдә Татарстан Республикасын лаеклы тәкъдим итеп, өченче урынны яулады.

«Слесарь-җыючы» номинациясе буенча Архангельскида узган федераль этапта Казан вертолет заводы слесарь-ремонтчысы Азат Сибгатуллин җиңүче булды. Һөнәре буенча ул инде 10 елдан артык эшли, конкурста үзенең белемнәрен һәм югары дәрәҗәдәге һөнәри әзерлеген күрсәтеп, ышанычлы җиңү яулады.

Сентябрьдә башкалада Казан радиомеханика көллияте базасында «Һөнәре буенча иң яхшы» конкурсының «Радиоэлектрон аппаратура монтажчысы» номинациясендә федераль этабы узды. Татарстан вәкиле - «АЙСИЭЛ ЭЛЕКТРОНИКС» җаваплылыгы чикләнгән җәмгыятенең кул белән монтажлау һәм ремонтлау участогы мастеры Инсаф Сибгатов көмеш медаль иясе булды.

Смоленск өлкәсендә федераль конкурста «Слесарь-корал җыючы» номинациясендә Казан вертолет заводы слесарь-корал җыючысы Дамир Касыймов көмеш призер булды.

2025 елның июлендә Казанда махсус хәрби операция катнашучылары арасында узган Россиядәге беренче «Абилимпикс» чемпионаты аерым әһәмиятле вакыйга булды. Чемпионат 79 төбәктән 259 махсус хәрби операция ветеранын берләштерде, ярышлар 15 компетенция буенча уздырылды. Татарстан Республикасы, катнашучыларга әзерлек һәм ярдәм күрсәтүнең югары дәрәҗәсен раслап, финалга чыгучылар саны буенча иң яхшы 5 төбәк арасына керде.