Казанда кышкы «Галим шәһәр кешесе» шәһәр лабораториясе ачыла

Денис Гордийко фотосы

Бу атнаның шимбә көнендә, 3 гыйнварда, Зур Зәңгәр күлдә «Галим шәһәр кешесе» шәһәр лабораториясенең кышкы циклы буенча беренче дәрес үткәрелә. Казанлылар өчен Казанның биш иҗтимагый киңлегендә барлыгы сигез чара үткәреләчәк – аларны Казансу яры буенда, Балыкчылар утравында, «Түбәнге Заречье» пляжында һәм «Елмай» балалар паркында оештырачаклар. Белем бирү-агарту чаралары 24 гыйнварда тәмамланачак.

«Бер ай эчендә без Казансу елгасы турында шактый мәгълүмат беләчәкбез, Зәңгәр күл серләренә төшенәчәкбез, эшкәртелгән пластиктан сувенирлар ясаячакбыз, кышкы балык тоту күнекмәләрен үзләштерәчәкбез, кайт белән идарә итәргә өйрәнәчәкбез һәм кошлар өчен агач җимлекләр ясаячакбыз», - дип хәбәр итә оештыручылар.

Зур Зәңгәр күлдә оештырылачак беренче дәрестә катнашучыларга тыюлык буенча экскурсия үткәреләчәк һәм кышкы вакытта күлләрнең торышы турында сөйләячәкләр. Очрашуны Татарстан Республикасы Фәннәр Академиясенең Экология һәм җир асты байлыкларыннан файдалану мәсьәләләре институты директорының фәнни эшләр буенча урынбасары Дмитрий Иванов үткәрәчәк. Чара 13:00 сәгатьтә башлана.

Катнашу өчен сылтама буенча алдан теркәлергә кирәк.

Лабораториядә иң актив катнашучыларны карда йөри торган махсус җайланмалар ярдәмендә орнитологик экскурсиягә чакырачаклар, дип хәбәр ителә «Казансуны үстерү стратегиясе» проектының телеграм-каналында.

Оештыручылар һава торышына бәйле рәвештә чаралар җәдвалында үзгәрешләр булырга мөмкин, дип кисәтә.

Алдарак якшәмбе көнне, 4 гыйнварда, «Елмай» паркында беренче тапкыр Яңа ел ярминкәсе үткәрелүе турында хәбәр ителгән иде. Яшь казанлыларга үзләрен эшмәкәр буларак сынап карау мөмкинлеге бирелә.