17 нче һәм 18 нче июньдә Казан триатлон буенча Россия чемпионатын кабул итәчәк

(Казан шәһәре KZN.RU, 12 нче июнь). 17 нче һәм 18 нче июньдә Казанда Бөтенроссия масштабындагы иң зур спорт стартларының берсе – триатлон буенча Россия чемпионаты узачак, аның кысаларында Ironstar Timerman Cup ярышлары оештырыла. «Ярымтимер» һәм Олимпия дистанцияләрендә ярышларда катнашучыларга өч этапны үтәргә туры киләчәк: йөзү, велоузыш һәм йөгерү.

Йөзү ярышлары Казансу елгасы акваториясендә узачак, ә велоузыш трассасы үзәк урамнар буенча, Казан Кремле диварлары һәм шәһәрнең төп истәлекле урыннары яныннан узачак. Соңыннан Кремль яр буе буйлап йөгерү оештырыла.

Ярышлар 113 км (1,93 км – йөзү, 90 км – велоузыш, 21,1 км – йөгерү) һәм Olympic (1,5 км – йөзү, 40 км – велоузыш, 10 км – йөгерү) дистанцияләрендә узачак, шулай ук ачык суда бер һәм ике диңгез миле – Swimstar, Ironlady хатын-кызлар йөгереше һәм балалар өчен Starkids була.

Катнашучыларны теркәү 17 нче июньгә кадәр сайтта үткәрелә, дип хәбәр итә оештыручылар.