Казанда быел тугыз җәмәгать киңлеге төзекләндереләчәк

2022 елда Казанда җәмәгать киңлекләрен төзекләндерү буенча тугыз проектны, шул исәптән сигезен «Уңайлы шәһәр мохитен формалаштыру» федераль проекты кысаларында тормышка ашыру планлаштырыла. Бу максатларга 941,1 млн сум бүлеп бирелгән, шулардан 405,4 млн сумы – федераль бюджет акчалары, 535,7 млн сумы – Татарстан Республикасы бюджетыннан.

Быел «Салават Күпере» микрорайонында 6 га мәйданлы беренче парк төзелеше тәмамланачак. Узган ел анда 5,2 мең кв. м мәйданда вак таш һәм тротуар плиткасы салынган, 137 яктырткыч һәм 45 видеокүзәтү камерасы урнаштырылган, 430 агач, 5 меңнән артык куак, 17,6 мең чәчәк утыртылган, 12 мең кв. м мәйданда газон утыртылган һәм җылылык системасы белән стационар бәдрәф модуле урнаштырылган. Быел паркта балалар һәм спорт җиһазлары, кече архитектура формалары һәм памп-трек урнаштырылачак. Моннан тыш, су янында ял итү урыны булган сулыкны төзекләндерү, фонтан урнаштыру, этләрне урамда йөртү өчен мәйданчык булдыру һәм җәмәгать бакчасы ясау планлаштырыла.

Нокса елгасының уң яры буенда «Светлая долина» ТК янында зур парк зонасын төзекләндерү башланачак. Паркны берничә этапта төзү планлаштырыла, быел эшләр «Лето» торак комплексыннан алып 184 нче номерлы мәктәпкә кадәрге территориядә башланачак.

Төзекләндерү концепциясе җәяүле сукмаклары һәм функциональ мәйданчыклар булган тыныч табигать паркы булдыруны күздә тота. Башта Ноксаны экореабилитацияләү үткәрелде – елга төбе һәм яр буе линиясе чистартылды, 1800 тоннадан артык калдык чыгарылды. Җирлекнең гамәлдәге рельефын исәпкә алып, биредә агач идәннәрдән бердәм сукмак салыначак һәм территорияне яктырту оештырылачак. Шулай ук паркта велосипед һәм йөгерү юллары булачак, пикниклар, ял һәм йога белән шөгыльләнү өчен зоналар барлыкка киләчәк. Яр буйлап күзәтү мәйданчыклары оештырылачак, кече архитектура формалары (эскәмияләр, урналар, навигация) урнаштырылачак. Территорияне өстәмә яшелләндерү планлаштырылган.

Елганың сул як ярында торак массивлар белән элемтәне тәэмин итү өчен өстәмә күпер барлыкка киләчәк. Аны урнаштыру урыны халык белән фикер алышу нәтиҗәләре буенча билгеләнгән.

Алга таба Нокса буенда 3 км озынлыкта бердәм парк зонасы оештырылачак, ул «Весна» торак комплексы янында төзекләндерелгән паркны үз эченә ала.

Агымдагы елда Яңа Савин районында узган ел төзелгән 7 нче номерлы шәһәр клиник хастаханәсе янындагы «Кече Акчарлак күле» паркын төзекләндерү эшләре тәмамланачак. Парк кече архитектура формалары һәм навигация белән җиһазландырылачак, анда өстәмә яшелләндерү һәм автоматик су сибү җайланмасы урнаштыру каралган. Мастер-класслар зонасында хастаханәнең хезмәткәрләре һәм пациентлары өчен чаралар уздыру өчен медиаэкран урнаштырылачак.

«Татарстан көзгесе» экокластерын булдыру кысаларында Авиатөзелеш районының Кадыш торак массивы янындагы Зур Зәңгәр күл территориясен төзекләндерү эшләре башланачак. Быел авариягә каршы чаралар уздырылачак – Зур Зәңгәр күлдәге шарлавык агып төшә торган ярлар гранит, композит шпунтлар һәм туфрак грунтлары белән ныгытылачак. Авария хәлендә булган агач күпер алыштырылырга тиеш.

Алга таба биредә кирәкле туристик сервислар белән тыныч ял итү һәм табигатьтә утыру өчен зона булдыру планлаштырыла. Хәзерге вакытта проектлау буенча эш алып барыла.

Танкодромда, 2018 елда төзекләндерелгән «Комсомолец» паркы янында, Татарстан Республикасы төзелеш тармагының 100 еллыгы скверын реконструкцияләү башланды. Быел реконструкция кысаларында сквердагы фонтанны ремонтлау һәм янәшәдәге территорияне төзекләндерү буенча чаралар үткәреләчәк. Мәйдандагы сулык ике мең тоннадан артык ләмнән чистартылган, фонтан касәсен урнаштыру эшләре бара. Су өслегендә заманча күп төзелешле фонтан урнаштырылачак, кыш көне сулык боз шугалагына әйләндереләчәк, анда яңа ел чыршысы урнаштырырга планлаштыралар. Су буенда күзәтү мәйданчыгы урнашачак, территорияне өстәмә яшелләндерү эшләре башкарылачак.

Шулай ук Адмиралтия бистәсендә Балыкчы бакчасын реконструкцияли башладылар. Беренче чират кысаларында паркның уң ягында Кызыл Армия урамы ягыннан эшләр башкарылачак. Кар һәм яңгыр яуган вакытта тротуарларны һәм балалар мәйданчыгын су басмасын өчен, гамәлдәге яшелләндерүгә зыян китермичә, территорияне вертикаль планлаштыру үзгәрәчәк. Бакча территориясендә һәм мәйданда чуен фонарьлар, шулай ук агачларны декоратив яктырту һәм ретро-лампочкалар белән парк гирляндасы урнаштырылачак. Балалар мәйданчыгында уен җиһазлары һәм парк эскәмияләре тулысынча алмаштырылачак, навигация һәм мәгълүмати стендлар урнаштырылачак. Паркта төрле типтагы түшәлгән таш һәм резин өслекле йөгерү сукмагы барлыкка киләчәк.

Моннан тыш, спорт мәйданчыклары җиһазларын һәм ике скверны – 2015-2016 елларда төзекләндерелгән «Азино-1» микрорайонындагы Бөек Ватан сугышы ветераннары аллеясын һәм Академик Парин урамындагы 4 нче микрорайондагы скверны яңарту планлаштырыла.

Юныс мәйданын реконструкцияләүгә аерым финанслау бүлеп бирелгән. 19 гасырдагы борынгы мәйдан Иске Татар бистәсенең үзәгендә урнашкан һәм Фатыйх Кәрим һәм Габдулла Тукай урамнары белән зур булмаган дүрт скверга бүленгән. Быел эшләр Габдулла Тукай әдәби музее янындагы скверда башкарылачак. Биредә урамнарны яктырту буенча өстәмә элементлар – фонарьлар, яктырткычлар һәм парк гирляндалары урнаштыру, сквер коймаларын алыштыру, шулай ук вак яфраклы юкә һәм куаклардан тере коймалар утырту, Иске татар стилендәге элементлар – урындыклар һәм ширма (көзге) рәвешендә мәгълүмат стенды урнаштыру планлаштырыла. 19 гасырның бакыр су алу колонкасы рәвешендәге фонтан үзәк элемент булачак.

Мәйданны реконструкцияләү кысаларында җәяүлеләр юнәлешләре схемасы яңадан каралды. Фатыйх Кәрим урамы ягыннан туристлык автобуслары өчен тукталыш күрше бинага күчереләчәк, ә аның урынында җәяүлеләр өчен тротуар киңәйтеләчәк.