Казанда бу атнада 18 меңнән артык өлкән сыйныф укучысы төп дәүләт имтиханы һәм бердәм дәүләт имтиханы тапшыра башлаячак

Имтихан марафоны бу атнада шәһәр мәктәпләренең 12 мең 731 тугызынчы сыйныф укучысы һәм 6046 чыгарылыш 11 нче сыйныф укучысы өчен башланачак. Дәүләт имтиханнарын тапшыру өчен бердәм дәүләт имтиханына – 25 пункт, төп дәүләт имтиханына – 53 пункт һәм дәүләт чыгарылыш имтиханнарын үткәрүнең 9 пункты әзерләнгән. Тагын 82 пункт сәламәтлек мөмкинлекләре чикле балалар өчен өйдә оештырылган.

11 нче сыйныфны тәмамлау турында аттестат алу өчен укучыларга рус телен һәм база яки профильле дәрәҗәдәге математиканы тапшырырга кирәк. 9 нчы сыйныфларга аттестат алу өчен 4 имтихан тапшырырга кирәк – 2 мәҗбүри (рус теле һәм математика), 2 имтиханны сайлап аласың.

Ел саен төп дәүләт имтиханын тапшыру өчен иң популяр дисциплиналар булып информатика (54%), җәмгыять белеме (47%), география (38%), инглиз теле (14%), биология (13%), физика (13%) һәм химия (10%) тора. 11 нче сыйныфны тәмамлаучыларныкы исә – профильле математика (51%), җәмгыять белеме (37%), физика (13%), информатика (25%), биология (17%), инглиз теле (16%) һәм химия (12%).

Узган ел белән чагыштырганда БДИ тапшыру өчен информатиканы сайлаган яшьләр саны 4% ка (21% тан 25% ка кадәр) арткан.

Шунысын да билгеләп үтәргә кирәк, быел җәмгыять белеме (42 дән 45 гә кадәр), физика, химия, биология (36 дан 39 га кадәр), әдәбият (32 дән 40 га кадәр) һәм информатика (40 дан 44 гә кадәр) фәннәре буенча чик күрсәткечләре артты. Узган ел информатика һәм мәгълүмати-коммуникацион технологияләр буенча БДИ формасын үзгәртте – биремнәр компьютерларда гына үтәлде. Быел әлеге имтихан электрон форматта 9 нчы сыйныфларда узачак.

Соңгы имтиханны 11 нче сыйныф укучылары 20 нче июньдә язачак, ә 9 нчы сыйныф укучылары өчен имтихан вакыты 17 нче июньдә тәмамланачак. Сайланачак предметлар буенча имтиханнары бер көндә узган укучылар һәм җитди сәбәпләр аркасында имтиханга килә алмаучылар өчен 1 нче июльгә кадәр резерв көннәр каралган.

Аттестатка 777 (12,8%) унберенче сыйныф укучысы һәм 838 тугызынчы сыйныф укучысы (6,6%) дәгъва итә. 11 нче сыйныфны тәмамлагач, «Укуда аерым уңышлары өчен» медале алу өчен, яхшы йомгаклау билгеләреннән тыш, чыгарылыш укучысына мәҗбүри рус теле һәм математика буенча ким дигәндә 70 балл алырга, БДИ форматында тапшырылган барлык башка фәннәр буенча минималь чикне үтәргә кирәк. Статистика күрсәткәнчә, Казан мәктәпләренең һәр унынчы чыгарылыш сыйныф укучысы – медаль иясе.

Дәүләт йомгаклау аттестациясен үткәргәндә процедураның объективлыгына, үткәрү пунктларының әзерлегенә, шулай ук процесста катнашучыларның иминлегенә аерым игътибар бирелә. Пунктларны Эчке эшләр министрлыгының Казан шәһәре буенча кинология хезмәтләре, шулай ук Дәүләт имтихан комиссиясе әгъзалары тикшерә. Контроль-үлчәү материаллары аудиториягә имтихан көнендә якланган элемтә каналлары аша килә. Контроль-үлчәү материаллары бастырыла, ә имтиханны язганнан соң, укучылар видеокүзәтү камералары астында сканерлана.

Имтиханнарны үткәрүнең барлык пунктлары мәгариф өлкәсендә күзәтчелек һәм контроль департаменты тарафыннан тикшерелә, алар кирәкле җиһазлар һәм канцелярия кирәк-яраклары белән җиһазландырылган. Оештыручылар укулар үттеләр һәм сынау имтиханнарын үткәргәндә үз белемнәрен практикада ныгыттылар. Дәүләт йомгаклау аттестациясен оештыруга 10 меңнән артык педагог җәлеп ителгән.

Дәүләт йомгаклау аттестациясен үткәрү көннәрендә штаттан тыш хәлләр килеп чыккан очракта, Социаль өлкә учреждениеләренә хезмәт күрсәтү департаментының челтәр компаниясе һәм авария бригадасы хезмәткәрләре кизү торачак.