Казанда 19 мең укучы җәйге мәктәп яны лагерьларында ял итәчәк

26 майдан 26 июньгә кадәр Казанда 165 мәктәп яны лагере эшләячәк. Аларда 8-13 яшьлек 19 мең бала ял итәчәк. Ата-аналарга юллама 817 сумга төшәчәк, ә ял итү бәясе 5 449,8 сум тәшкил итә. Аерманы Татарстан бюджеты субсидияли. МХОдә катнашучыларның балалары лагерьларга бушлай йөриячәк.

Быел мәктәп лагерьлары программасы Җиңүнең 80 еллыгына һәм Ватанны саклаучылар елына багышланган. Балалар өчен тематик мастер-класслар, Бөек Ватан сугышы турында фильмнар күрсәтү, ветераннар һәм тыл хезмәтчәннәре белән очрашулар, шулай ук хәрби-спорт уеннары һәм конкурслар оештырыла.

827 югары сыйныф укучысы мәктәпнең хезмәт бригадаларында үзләренең беренче акчаларын эшли алачак. Яшүсмерләр мәктәп яны территорияләрендә һәм биналар эчендә 13 көн 3-5 сәгать көчләре җитәрлек эшләр эшләячәк. 14-15 яшьлек яшүсмерләргә – 7 553,14 сум, 16-17 яшьлек балаларга 8 632, 73 сум хезмәт хакы түләнәчәк.

Өстәмә белем бирү учреждениеләрендә 1 июньнән 30 августка кадәр кыска вакытлы төркемнәр эшләячәк, ә андагы спорт һәм ял итү мәйданчыклары көндез һәм кичен ачык булачак.