Казаннан Лисичанскка һәм Рубежноега 18 тонна мандарин җибәрелде

Гуманитар йөк итеп җибәрелгән продукцияне шәһәр эшмәкәрләре тәкъдим иткән

Яңа ел алдыннан Казан тарафыннан шефлыкка алынган Лисичанск һәм Рубежное шәһәрләрендә яшәүчеләргә чираттагы зур гуманитар ярдәм җибәрелде. Төп йөк буларак 18,1 тонна мандарин юлланган. Күчтәнәчләр төялгән зур йөк машинасы «Игелекле Казан» фонды эгидасы астында озатылган. Яңа ел продукциясен шәһәр базарларында эшләүче эшмәкәрләр тәкъдим иткән.

Марат Мөгыйнов фотосы

«Яңа ел алдыннан менә инде дүртенче ел рәттән без шефлыкка алынган Лисичанск һәм Рубежное шәһәрләрендә яшәүчеләргә бәйрәм кәефе бүләк итәргә тырышабыз. Бүген алар өчен 18 тонна мандарин җибәрәбез. Без шефлык иткән вакытта Лисичанск һәм Рубежноега төрле товарлар төялгән 86 йөк машинасы җибәрдек инде. Безгә 400 гә якын шәһәр предприятиесе һәм оешмасы кушылды. Без иң авыр вакытларда да игелек эшләргә тырышабыз!», - дип, игелекле эшнең мөһимлеген билгеләп үтте Казан мэры Илсур Метшин. Йөкне озатып җибәргәндә ул машина йөртүчеләргә хәерле юл теләде.

Лисичанск һәм Рубежное өчен ярдәм күрсәтү Татарстан башкаласында 2022 елның 31 октябреннән алып барыла. Бу чорда төп склад һәм кирәк-ярак җыю пунктлары аша предприятиеләрдән, шәһәр халкыннан 1 626 тоннадан артык ирекле ярдәм чаралары җыелган.

Шәһәр предприятиеләре һәм оешмалары ярдәм чараларына актив кушыла. Шушы вакыт аралыгында әлеге игелекле эштә 400 дән артык оешма һәм мең ярымнан артык Казан халкы катнашкан. Шәһәр хакимияте ассызыклаганча, яңа төбәкләрдә яшәүчеләрнең ихтыяҗларын исәпкә алып ярдәм итү гуманитар эшнең төп принцибы булып тора.